CP成為基恩之家傳道人見證分享

2024年3月24日，在上主，眾基恩之家肢體及各地友好的見證下，非常感恩被授職成為基恩之家傳道人，希望能夠同基恩肢體們互相成長，互相學習，互相敬拜。

我個人在一個中產家庭長大，媽媽在一所
傳統保守教會中敬拜，當時爸爸是相信民間宗教，數年前決志歸主。我個人信仰成長，由小學開始經歷天主教，中學的路德宗，英國聖公會到今日的基恩之家，當中認識及學習到不同宗派及教會的獨特歷史，創立時的文化背景，神學觀及宗派間的智慧，尊重同理解每個宗派及教會，發掘同探索佢哋嘅寶藏。

我在中一嘅時候開始意識到自己對同性有好感，但礙於在當時保守教會學校文化中成長，被教導及灌輸「同性戀是罪」，因此當時唔願意去面對真實的自己及內在嘅渴望，極力否認自己嘅情感同壓抑自己，當中經歷好多痛苦同掙扎，精神同情緒唔係好健康。

2009年我在英國學成回到香港，當時在外國有好多同志友善教會，因此我好奇地在網上搜尋香港有冇歡迎及接受同志嘅教會，搜尋第一個結果就出現咗‘基恩之家’！我當時膽粗粗就返左基恩之家，同基恩結下呢個緣份，展開左我人生一個重要嘅屬靈旅程。

我返到基恩由一名平信徒開始，到2015年成為基恩同工一同參與上主嘅同志事工，由行政事奉慢慢服侍上主嘅教會，到學習領詩事奉，帶領伴侶小組，短暫離開基恩走到社區去建立以公共神學為理念嘅「公共教會」同學習講道。當中可以看到好多由上主而來嘅恩典及帶領，上主藉着唔同人同事在我生命之中加力，在我能力有限嘅時候有一班好好嘅同工一齊同行，有牧者喺當中嘅支持同教導。

我個人生命在基恩得到改變及成長，在當時的牧者教導下，我開始學習靈修，每天花30分鐘同自己嘅身體，自己嘅內在情緒及大自然去溝通和復和。在牧師嘅鼓勵下，我開始接觸沙維雅家庭輔導，了解來自原生家庭，學校，教會及社會對自己造成嘅傷痛及影響，在沙維雅輔導旅程及在基恩門徒訓練101-401課程中，我由一個扭曲嘅生命，到生命得到改變，醫治，釋放，最後學習接納自己，我嘅生命更加圓滿，感受到上主愛同志，上主愛我呢個生命，我是上主嘅寶貝！

我更在基恩之家找到我生命中另外一半，經歷了6年嘅愛情長跑，我同伴侶在2017年拉埋天窗，在英國註冊結婚，2018年在基恩舉行祝福禮，感恩有雙方的屋企人，朋友，教友肢體一同出席，當中可以看到上主給予我哋同志有好多好多嘅恩典同祝福。

有肢體問我，其實傳道人係做啲咩㗎？其實就好似當時嘅耶穌，我同肢體同行，喺佢哋無助軟弱嘅時候陪伴，憂傷嘅時候同佢飲泣，帶領佢由黑暗中見到光明。我相信上主創造每個人都係美好，生命只係被社會同原生家庭影響而被扭曲，因此睇唔到自己美麗嘅彩虹。我相信每個人都可以返到上主原原本本美好創造嘅本相，可以快樂地活出真誠嘅生命，在世界發光發亮，彰顯基督的生命同馨香。

**CP 現為基恩之家傳道人及伴侶小組組長